हो मैं तो किस्मत का मारा तेरे धाम आया सूं
हो मैं तो किस्मत का मारा तेरे धाम आया सूं,
इस दुनिया नै बाबा घणा तड़पाया सूं,
सह–सह के ताने दिल पत्थर का होया,
तेरे बिना कोन छात्ती कै लगावगा,
खाटू आले तू संभाल ले भगत तेरे नै,
ना तो बिन आई दास तेरा मारया जावैगा।
मनै करया नहीं माडा कदे करया ना गलत,
फेर भी क्यों बाबा बुरा चाल्र्या बखत,
सुनया हारे का सहारा सै तू हारण ना देवै,
बैठया आस लगाए बाबा तेरा यो भगत,
पहेली या जिंदगी की उलझी सै बाबा कद आकै नै इसनै तू सुलझावैगा,
खाटू आले तू संभाल ले भगत तेरे नै,
ना तो बिन आई दास तेरा मारया जावैगा।
के कमी थी बतादे मेरी मेहनत मैं बाबा,
इन ठोकरा मैं रूल के जो रहगया सूं मैं,
इब मर्जी सै तेरी चाहे मार चाहे तार,
हर एक बात तेरे आगे कहगया सूं मैं,
इस कुंगडिया सुनील की जो आस बची सै,
तेरे ही नाम बाबा कर जावैगा,
खाटू आले तू संभाल ले भगत तेरे नै,
ना तो बिन आई दास तेरा मारया जावैगा
श्रेणी : खाटू श्याम भजन